Sprettskórinn

Í sögu hestamannafélagsins Gusts segir frá upphafi Sprettskórsins, sem má má rekja til stofnunar Gustskórsins árið 1993. Eftir stofnun hestamannafélagsins Spretts árið 2012, með samruna hestamannafélaganna Gusts og Andvara var nafni kórsins breytt í Sprettskórinn.

Á aðalfundi Spretts 12. mars 2014 færðu kórinn og Kulsfélagið Hestamannafélaginu Spretti flygil þann sem er notaður í salnum, m.a. á æfingum kórsins.

Með árunum hefur söngstarfið eflst og dafnað. Stjórnandi kórsins nú um árabil hefur verið Atli Guðlaugsson. Hann hefur hvatt kórinn áfram af miklum dugnaði.

Árið 2023 var farið í söngferð/kóramót til Borgundarhólms þar sem kórinn fékk mjög góðar viðtökur. Árið 2025 fór kórinn svo á Íslendingaslóðir í Vesturheimi og heimsótti m.a. Mountain í Norður Dakóta í Bandaríkjunum og Winnipeg og Gimli í Manitobafylki í Kanada. Sú ferð var undirbúin og farin með Karlakór Hreppamanna. Í ferðinni voru um 70 karlakórsmenn og 45 gestir þeirra. Sumarið 2025 voru 4 söngskemmtanir og sungið við messu í Skálholti. Í byrjun október tók kórinn þátt í kóramóti á vegum Karlakórs Kópavogs þar sem fimm kórar hittust og sungu bæði saman og hver í sínu lagi.

Nú er kórinn kominn á vit nýrra ævintýra. Kórfélagar eru tæplega 40 talsins á aldrinum 14-80 og eru Sprettsfélagar sérstaklega hvattir til að koma og syngja með kórnum. Þótt kórinn státi af því að vera eini karlakórinn sem starfar innan vébanda hestamannafélags þá eru allir söngelskir karlar velkomnir í kórinn. Æft er á mánudögum kl. 20-22, í Samskipahöllinni og alla jafna frá því göngum er lokið að hausti og fram yfir sumarmál.

Birt á ábyrgð stjórnar Sprettskórsins í janúar 2026.