Fyrsta keppnisgrein vetrarins, Eiðfaxa TV fjórgangurinn, í Samskipadeildinni, Áhugamannadeild Spretts fór fram fimmtudaginn síðastliðinn.
Það var frábær mæting í höllina um kvöldið og mörg sem gæddu sér á glæsilegu hlaðborði töfrað fram af snilldarkokkunum hjá Flóru. Við þökkum öllum sem lögðu leið sína í Samskipahöllina kærlega fyrir komuna.
Það voru þær Erla Guðný Gylfadóttir og glæsihryssan Fluga frá Garðabæ sem leiddu eftir forkeppnina og gáfu þær ekkert eftir í úrslitunum og tryggðu sér gullið með einkunnina 6,83.
Í öðru sæti voru Darri Gunnarsson og Draumur frá Breiðsstöðum og í því þriðja sigurvegari síðasta árs, með nýjan hest í þetta skiptið, Kristín Ingólfsdóttir og Blakkur frá Skeiðvöllum.
Eiðfaxi TV veitti glæsileg aukaverðlaun. 3 sæti hlaut 3 mánaða áskrift af Eiðfaxa TV, 2. sæti vikupassa á Landsmót 2026 á Hólum í Hjaltadal og efsta sæti ársáskrift að Eiðfaxa TV að verðmæti 49.900. Þökkum við Eiðfaxa TV kærlega fyrir það.
Þorgerður Gyða Ásmundsdóttir og Hnokki frá Áslandi stóðu uppi sem sigurvegarar í B-úrslitum með einkunnina 6,47
Í liðakeppninni var það liðið Fossvélar sem voru hlutskörpust, auk Erlu Guðnýjar kepptu þær Þórdís Sigurðardóttir sem komst í B-úrslit og Theódóra Þorvaldsdóttir sem var rétt utan B-úrslita. Aðrir liðsmenn eru Gunnar Már Þórðarson og Þórunn Kristjánsdóttir (vantar á mynd)
Staðan í liða- og einstaklingskeppni er eftirfarandi eftir fyrstu grein:
Næst verður keppt í slaktaumatölti í boði Sveiflu. Keppni fer fram 5. mars. Hlökkum til að sjá ykkur þá !
