Sátt – hestaatferli

Þann 8. október hefst nýtt 6 vikna námskeið í Spretti þar sem áhersla verður lögð á samskipti, traust og öryggi hests og knapa.

Unnið verður með að lesa atferli hestsins, skilja betur hvað liggur að baki viðbrögðum hans og bregðast við á skýran og sanngjarnan hátt. Áhersla verður lögð á jákvæða styrkingu og að taka mið af atferli, líðan og viðbrögðum hvers hests.

Einnig verður unnið með viðbrögð knapans, sjálfstraust og óöryggi og hvernig eigin líðan og viðbrögð geta haft áhrif á samskiptin við hestinn. Flest lendum við einhvern tímann á þeim stað í hestamennskunni að þurfa á stuðningi að halda. Á námskeiðinu verður lögð áhersla á að mæta hverjum þátttakanda þar sem hann er staddur og veita stuðning við að takast á við óöryggi, byggja upp sjálfstraust og stíga út fyrir þægindarammann í hæfilegum skrefum. Markmiðið er að byggja upp traust og öryggi svo hestur og manneskja geti orðið öruggari saman.

 

Námskeiðið stendur yfir í 6 vikur og aðeins 4 þátttakendur verða í hverjum hópi. Kennt verður tvisvar í viku:

• Eitt skipti í reiðhöll, Húsasmiðjuhöll, með fjölbreyttum æfingum. Mánudagar tímasetningar í boði milli kl.17-19. Fyrsti verklegi tíminn hefst 12.okt.

• Eitt skipti í útreið þar sem unnið verður með sömu þætti við raunverulegar aðstæður. Dags- og tímasetningar í samráði við nemendur.

Þátttakendur mæta með eigin hest og unnið verður með sama hestinn út námskeiðið, þannig að hægt sé að byggja markvisst ofan á samskipti, traust og öryggi hjá hverju pari.

Námskeiðið hefst á fyrirlestri þann 8.okt og kynningu þar sem farið verður yfir grunnatriði í atferli hesta, samskiptum og nálgun námskeiðsins. Að sex vikum loknum verður lokafundur þar sem farið verður yfir helstu atriði námskeiðsins og næstu skref.

Um kennarann

Guðrún Pálína Jónsdóttir hefur starfað með dýrum í um 20 ár og verið í hestamennsku frá unglingsárum. Lengst af starfaði hún sem dýrahirðir og hefur því mikla verklega reynslu af umönnun, atferli og þjálfun fjölbreyttra dýrategunda. Í dag starfar hún í fræðsludeild Fjölskyldu- og húsdýragarðsins þar sem hún sinnir meðal annars fræðslu og dýraþjálfun. Guðrún Pálína er með BS-gráðu í sálfræði frá Háskóla Íslands og BS-gráðu í búvísindum og lýkur nú í haust MSc-gráðu í klínískri dýraatferlisfræði frá Edinborgarháskóla, með áherslu á hesta.

Á námskeiðinu SÁTT – HESTAATFERLI fléttast saman hestamennska, dýraatferlisfræði, sálfræði og áralöng verkleg reynsla af vinnu með dýr – með áherslu á skilning, traust og aukið öryggi bæði hests og manneskju.

Verð er 27.500kr. Skráning fer fram á abler.io og opnar skráning föstudaginn 18.sept. kl.12:00.

Námskeiðið er haldið með fyrirvara um lágmarksþátttöku.

Áhugasöm mega senda á satthestaatferli(hja)gmail.com og/eða thordis(hja)sprettur.is